Leonora Demaj, kapitenia e Kosovës në hendboll, është larguar nga skuadra Vendsyssel, që nga elita daneze ka rënë në kategorinë e dytë. Ka kaluar te Ringkobingu, që nga kategoria e dytë është promovuar në elitën e Danimarkës, njërin prej vendeve me hendbollin më të zhvilluar në botë.

Ringkobingu të enjten ka njoftuar se ka firmosur për dy vjet me kapitenen e Kosovës. Te Ringkobingu luajnë motrat Marigona e Arlinda Hajdari, tashmë reprezentuese të rëndësishme të Kosovës.

Demaj ishte lënduar sa ishte pjesë e Soenderjyskes në kategorinë e dytë daneze. Në fund të dhjetorit të vitit të kaluar kishte kaluar te Vendsyssel. Por për këtë skuadër nuk e ka luajtur asnjë ndeshje, pasi ishte në fazë rikuperimi. Kjo skuadër ka njoftuar ditë më parë se Demaj ka pranuar një ofertë që nuk ka mundur ta refuzoj.

Te Ringkobingu e kanë prezantuar 22-vjeçaren Demaj si përforcim të madh.