Edhe kampanjat e pasura reklamuese, produktet fantastike, çmimet e përballueshme, zbritjet e mëdha ose veçoritë e super dizajnit ndonjëherë nuk janë në gjendje të arrijnë rezultatet e dëshiruara për dyqanet online.

Pse? Pronarët e tyre as nuk e imagjinojnë se sa shumë mund të humbasin për shkak të problemeve të webfaqes! Këto shpesh janë të një natyre teknike dhe të lehta për t’u shmangur ose rregulluar. Megjithatë, ato mund të ndikojnë shumë në kënaqmërinë e klientit dhe, natyrisht, në shitje.

Le të kemi një përmbledhje të disa problemeve të webfaqes së tregtisë elektronike, në mënyrë që çdo dyqan online të ketë një shans për t’u përmirësuar.

Disa probleme të zakonshme të webfaqes së eCommerce

Defektet dhe Gabimet

Defektet dhe gabimet mund të fshihen në çdo cep të një faqe interneti të tregtisë elektronike. Klientët tuaj madje mund t’ju falin për një gabim 404 ose një lidhje të thyer në një faqe produkti. Sidoqoftë, është veçanërisht e keqe të kesh defekte në proceset e porositjes, blerjes ose pagesës së produktit.

Shembujt përfshijnë mos aplikimin e zbritjeve të premtuara ose transportin falas, gabime të pashpjegueshme në përpjekje për të porositur një produkt, gabime të palogjikshme në dorëzimin e një formulari (shpesh me nevojën për ta plotësuar përsëri) dhe shumë të tjera. Këto mund ta kthejnë përvojën e përdoruesit në një makth, t’i trembin përdoruesit ose ta bëjnë blerjen krejtësisht të pamundur edhe për klientët më këmbëngulës.

Të gjithë hapat që ndërmarrin përdoruesit tuaj në dyqanin tuaj online kanë nevojë për testim gjithëpërfshirës, në mënyrë që të mos humbni kurrë fitimet tuaja për shkak të defekteve.

Imazhe të dobëta dhe pa zmadhim (ang. zoom)

Për shumë njerëz, tregtia elektronike ndihet e rrezikshme, sepse ata nuk mund t’i shohin produktet me sytë e tyre. Dyqanet online mund ta minimizojnë këtë rrezik duke ofruar imazhe të mira. Fatkeqësisht, shumë prej tyre e neglizhojnë këtë mundësi.

Imazhet duhet të tregojnë produktin nga këndvështrime të ndryshme dhe të kenë cilësi të lartë. Sidomos nëse ofroni produktet tuaja, investimi në foto, video apo edhe imazhe 3D profesionale mund të shpërblehet shpejt.

Përveç kësaj, veçoria e zmadhimit duhet gjithashtu të jetë në vend dhe të funksionojë siç duhet. Një nga problemet e faqes së tregtisë elektronike është zoom-i që nuk i zmadhon vërtet imazhet, madje i bën ato më të vogla.

Përshkrime të pamjaftueshme të produktit

Përveç shikimit të imazheve, përdoruesit duan të marrin sa më shumë detaje rreth produktit. Përshkrimet e përgjithshme për të gjitha produktet nuk funksionojnë. Çdo produkt ka karakteristika të veçanta dhe ato duhet të përshkruhen plotësisht.

Regjistrim i detyrueshëm ose i vështirë

Tregtia online vlerësohet për lehtësinë e saj. Përdoruesit hezitojnë të bëjnë lëvizje shtesë. Një problem i zakonshëm i webfaqes së tregtisë elektronike është procesi i bezdisshëm regjistrimi.

Një veçori e blerjes si mysafir (ang. a guest checkout) është një rekomandim i fortë për dyqanet online. Njerëzit gjithashtu pëlqejnë opsionin për t’u identifikuar me llogaritë e tyre të mediave sociale. Kur bëhet fjalë për regjistrimin, numri i hapave duhet të jetë minimal.

Përkrahje jofunksionale

Konsumatorët mund të kenë pyetje në lidhje me produktet ose duan të ankohen për disa probleme të procesit të blerjes.

Për fat të keq, përdoruesit shpesh ndeshen me një bisedë të përkrahjes me probleme që nuk arrin të japë mesazhe. Informacioni i kontaktit i paqartë ose i munguar është një tjetër problem i zakonshëm i webfaqes së tregtisë elektronike eCommerce.

Mungesa e optimizimit celular

Sipas Statista, një në katër dollarë të tregtisë elektronike shpenzohet në një pajisje celulare, dhe ky është vetëm fillimi. Kjo audiencë mbresëlënëse ua kthen shpinën dyqaneve online që nuk janë të optimizuara siç duhet dhe kërkojnë lëvizje të tepruar, zmadhim ose e bëjnë të vështirë shikimin e disa përmbajtjeve.

Merrni parasysh dizajnin responsiv për celularin, në të cilin të gjithë elementët e një faqe interneti përshtaten me ekranin e pajisjes ose një version celular të webfaqes suaj të tregtisë elektronike. Çdo hap – nga shfletimi i produktit deri te arka – duhet të jetë i përshtatshëm për t’u kryer.

Tarifat e fshehura

Përdoruesit ndjehen të mashtruar kur papritmas përballen me tarifa transporti ose të tjera që nuk i prisnin. Kjo është veçanërisht e vërtetë për dërgesat ndërkombëtare.

Pra, dyqanet online duhet t’i paraqesin të gjitha tarifat në mënyrë transparente dhe sa më shpejt që të jetë e mundur – jo në hapat e fundit të procesit të arkëtimit.

Vlerësime/Review të sajuara

Vlerësimet e produkteve janë shumë të dobishme për shitjet. Sidoqoftë, komentet shumë entuziaste, 100% pozitive do të duken gjithmonë të dyshimta.

Dyqanet e mëdha zakonisht i lejojnë përdoruesit të lënë të gjitha llojet e komenteve – pozitive ose negative. Përdoruesit janë në gjendje të “filtrojnë” informacionin pozitiv dhe negativ që shohin për produktin. Ata thjesht duan të dinë se nuk janë të mashtruar.

Filtrim i dobët

Webfaqet më të mira zakonisht ofrojnë filtrim të detajuar sipas parametrave të shumtë – për shembull, veshja filtrohet sipas madhësisë, ngjyrës, sezonit, rastit dhe më shumë. Por shumë dyqane nuk ofrojnë as filtrim elementar. Përdoruesit shfletojnë shumë faqe me artikuj të parëndësishëm dhe lodhen ose zhgënjehen.

Filtrat janë bekimi i tregtisë në internet dhe nuk janë vërtet të vështira për t’u vendosur. Nëse ua ofroni klientëve tuaj, ata do të gjejnë shpejt atë që duan dhe do të kthehen përsëri në webfaqen tuaj në të ardhmen.

Shpejtësi e ulët

Shpejtësia e keqe nuk është thjesht një problem i webfaqes së tregtisë elektronike – është i zakonshëm në të gjithë industritë. Megjithatë, mund të jetë veçanërisht e dëmshme për një dyqan online. Përdoruesit e tij zakonisht shfletojnë produkte të shumta dhe i krahasojnë ato, kështu që urrejnë të presin që çdo faqe të ngarkohet.

Optimizimi i shpejtësisë është i domosdoshëm. “Tre sekondat” klasike dihet se janë kufiri i durimit të një përdoruesi mesatar.