Nesër nga ora 20:45 Kosova do të luajë kundër Spanjës, në kuadër të kualifikimeve për Kampionatin Botëror “Qatar 2022”.

Një nga çështjet që më të komentuara ishte nëse Spanja do të lejojë intonimin e himnit të Republikës së Kosovës dhe flamurin në këtë ndeshje, pasi që ky shtet nuk e njeh Pavarësinë e Kosovës.

Për këtë ka folur sot kryetari i Federatës së Futbollit të Kosovës Agim Ademi.

Kreu i FFK-së u shpreh se ndeshja do të zhvillohet sipas protokolleve të përcaktuara nga FIFA dhe UEFA. Por, nëse himni i Kosovës nuk do të intonohet gjatë ndeshjes, Kombëtarja do ta lëshojë fushën dhe do të niset menjëherë për Kosovë.

“Ne i përshendesim gazetarët dhe referat dhe ikim për Kosovë. Në asnjë mënyrë nuk do të luhet loja. Por, nuk do të ndodh ajo sepse protokolli është në përpikmëri”, u shpreh Agim Ademi.